RAIS KIKWETE AMTUMIA SALAMU ZA RAMBIRAMBI MKUU WA SHIRIKA LA MAKAPUCHINI!

                                    

TAARIFA KWA VYOMBO VYA HABARI

Rais wa Jamhuri ya Muungano wa Tanzania, Mheshimiwa Jakaya Mrisho Kikwete amemtumia salamu za rambirambi Mkuu wa Shirika la Makapuchini nchini Tanzania, Padre Wolfgan Peter, kuomboleza vifo vya mapadre wanne wa shirika hilo waliopoteza maisha yao katika ajali ya gari jana, Jumanne, Novemba 22, 2011 eneo la Ruvu kwa Zoka, Bagamoyo, mkoa wa Pwani.


Katika salamu hizo, Mheshimiwa Rais Kikwete amesema kuwa amesikitishwa na kuhuzunishwa na vifo vya mapadre hao. “Nimepokea kwa masikitiko na huzuni nyingi habari za vifo vya mapadre wa Shirika lako la Makapuchini katika ajali ya gari. Napenda kukutumia wewe binafsi salamu za rambirambi na kupitia kwako kwa waumini wote wa shirika lako.”


Ameongeza Rais Kikwete katika salamu zake: “Napenda kukuhakishia kuwa Serikali yangu na mimi binafsi tuko nanyi katika wakati huu wa huzuni. Msiba wenu ni msimba wetu. Namwomba Mwenyezi Mungu aziweke pema peponi roho za marehemu. Amen.”


Imetolewa na:

Kurugenzi ya Mawasiliano ya Rais,

DODOMA.

23 Novemba, 2011